情侶拍拖浪漫行！戀上台北四日三夜

美食

景點

排行榜

購物

優惠

情侶拍拖浪漫行！戀上台北四日三夜

192

By Kinnso on 19 Jan 2024Editor

重點摘要

你覺得浪漫係乜嘢？係日積月累嘅陪伴，定係精心安排嘅驚喜？今次幫你規劃咗四日三夜拍拖完整行程，睇風景、浸溫泉、行街、食靚餐樣樣都有，想要創造屬於你哋兩人嘅浪漫回憶，千萬唔好錯過啦，快啲睇睇先！

本文目錄

Day 1：森林溫泉趣

「纜車森林遊樂區」雲仙樂園

「浸溫泉看山景」旅晨溫泉民宿

Day 2：睇view影靚相

「浪漫健行」陽明山國家公園步道

「熱門景觀餐廳」屋頂上 THE TOP

Day 3：單車悠遊行

「單車路線好風光」關渡金色水岸自行車道

「情侶必去」淡水情人塔

Day 4：美食襯天鵝

「湖面映燈光」碧潭

「人氣排隊小食」公館劉記古早味蔥蛋餅

Day 1：森林溫泉趣

「纜車森林遊樂區」雲仙樂園

首先嚟到臺灣第一座森林遊樂區，要搭纜車先至去到㗎，喺纜車上可以飽覽烏來山水街景，吸收森林芬多精；園區內有豐富嘅自然景觀，包括瀑布、吊橋、岩道等，好適合合影靚相，仲有多元化嘅遊樂設施，由划船、射箭到漆彈都有，推介你哋一定要划船，風景好又可以兩人浪漫乘船；如果想食野，都可以買下午茶或者套餐餐券，悠閒食完餐點，補返精神再走；唔少人仲會喺呢度嘅雲仙大飯店過夜，不過要提前預約㗎！

官方網站：https://www.yun-hsien.com.tw/

購買票券：https://bit.ly/3ZYX3Dk

營業時間：平日09:30~16:30、假日09:30~17:00

地址：新北市烏來區烏來里瀑布路1-1號

前往方法：搭新店客運至烏來站轉台車或步行20分鐘

「浸溫泉看山景」旅晨溫泉民宿

烏來最出名嘅活動就係浸溫泉啦！有好多間溫泉會館可以選擇，大部分溫泉或湯屋體驗時間為1.5至2.5小時，有啲可以加購餐點，甚至也能住宿，最重要有超靚風景可以睇！前面體驗完雲仙樂園嘅各種設施後，自然要浸溫泉休息吓，今次推介來旅晨溫泉民宿，有山景套房可以揀，房間內佈置文青舒適，浸完仲有得躺吓休息，好浪漫㗎！

官方網站：https://re-change-wulai.mydirectstay.com/tw/index.html

購買票券：https://bit.ly/3QmwzbN

營業時間：10:00~23:00

地址：新北市烏來區西羅岸路37號

前往方法：搭台車步行19分鐘

Day 2：睇view影靚相

「浪漫健行」陽明山國家公園步道

朝早嚟到陽明山國家公園，呢度有許多遊憩據點、步道與單車道，無論係當地人定係遊客都好鍾意嚟踏青，其中有幾個著名嘅自然景觀，例如竹子湖、擎天崗、七星山等，兩人可以一齊欣賞大自然嘅鬼斧神工。而步道都有多條路線，可以揀自己行或者預定專人導覽，依照路線難度選擇適合嘅步道，咁就睇返你哋想創造具挑戰性定係悠閒浪漫嘅回憶囉！如果係蝴蝶季來訪，仲可以見到各種蝴蝶漫舞㖭！

官方網站：https://www.ymsnp.gov.tw/main_ch/com_linemap_m.aspx?id=3&uid=1394&pid=16

購買導覽行程：https://bit.ly/490OPyI

地址：台北市北投區竹子湖路1-20號

前往方法：搭捷運至劍潭站，轉搭紅5公車至陽明山站，再轉108公車至陽明山國家公園管理處站

「熱門景觀餐廳」屋頂上 THE TOP

浪漫旅途點可以少咗景觀餐廳呢？屋頂上係台北好出名嘅拍拖景點，座位眾多卻都係大排長龍，使用唔同顏色嘅燈光與座位設計，分成多個座位區，餐牌會因為俾分到嘅位置有差異，不過最重要嘅就係個view好靚啊！可以睇晒成個台北景色，下晝、夜晚各有美感，但係一般座位區不接受訂位，排隊半個鐘都係正常嘅，所以可以選擇避開尖峰時間或提早排隊，唔使擔心安排到視野相較差嘅位置，整區都可以自由行走，多影啲靚相啦！

官方網站：https://www.compei.com/index.php

營業時間：週一17:00~21:00、週五17:00~05:00、其餘17:00~03:00

地址：台北市士林區凱旋路61巷4弄33號

前往方法：搭260公車至文化大學站步行20分鐘

Day 3：單車悠遊行

「單車路線好風光」關渡金色水岸自行車道

第三日嚟踩踩單車啦！金色水岸自行車道全長約15公里，沿途風光明媚，邊踩邊傾計超浪漫！首先可以由關渡宮前面借單車，台北嘅ubike共享單車系統好方便，可以異地還車，當然都可以搵附近嘅單車店借車，一路經過好悠閒嘅關渡自然公園，跟住就係紅樹林生態保護區，可以睇到水筆仔等紅樹林植物，有時仲有螃蟹行喺單車道上，小心唔好壓到，最後就會踩到淡水啦！

關渡單車道簡介：https://hk.trip.com/travel-guide/attraction/taipei/guan-du-bikeway-22846596/

地址：台北市北投區大度路3段296巷51號

前往方法：搭捷運至關渡站租借共享ubike或找單車店

「情侶必去」淡水情人塔

踩單車到淡水，梗係要行吓淡水老街啦！除咗品嚐阿給等美食，亦可以行到大概starbucks河岸門市附近，通常會有街頭藝人唱歌，搭上淡水河夜景，實在浪漫！後頭都有設置景觀餐廳，但係如果時間許可嘅話，推介去情人塔，嗰個係旋轉式景觀塔，夕陽或晚上時分最靚，不過體驗時間較短，要睇住時間影相！

官方網站：https://newtaipei.travel/zh-tw/attractions/detail/109658

情人塔票券購買：https://bit.ly/3rV6Xtk

情人塔營業時間：週五至週日10:30~18:30

地址：新北市淡水區觀海路83號

前往方法：搭渡輪至漁人碼頭

Day 4：美食襯天鵝

「湖面映燈光」碧潭

最後一日嚟到碧潭，首先前往最出名嘅碧潭大橋，此橋連通碧潭東西兩岸，夜晚橋上燈光開啟後更具有一番風采；跟住可以沿親水步道欣賞碧潭自然景觀，而情侶最適合嘅活動就係乘搭天鵝船啦！兩人一艘漫遊水上風光；之後可以去到碧潭風景區，有眾多特色餐廳及商店，無論下晝或晚上都好舒適；最幸運就係啱啱好遇到水舞展演期間啦，燈光投影加上水舞好驚豔！

官方網站：https://newtaipei.travel/zh-tw/Attractions/Detail/109613

地址：新北市新店區碧潭

前往方法：搭捷運至新店站步行9分鐘

「人氣排隊小食」公館劉記古早味蔥蛋餅

公館商圈圍繞臺灣大學，可到校園中嘅椰林大道走走，也能去水源市場買特色美食及服飾，許多小食攤傍晚就開始營業啦，由鹽酥雞、紫米牛奶到蔥油餅等地道美食都有，今次要介紹嘅係排隊蔥蛋餅，餅皮又厚又嫩，配上蔥蛋好香㗎，仲有店家自製辣醬可以自行添加，真係好辣，要自掂個量啊！重點係平又大份，所以基本上幾點去都要排隊嘅。

照片來源：https://momotravel.tw/liuji/

營業時間：15:00~00:30、週三四公休

地址：台北市中正區羅斯福路四段108巷2-3號

前往方法：搭捷運至公館站 1號出口步行3分鐘